OpenOffice.org & LibreOffice

    OpenOffice.org pen atawmzaw in "OpenOffice" ahih keileh "OOo" ci-in kitheizaw hi. Hih OpenOffice pen Microsoft Company te Office mah bangin Word Processing, Spreadsheets, Presentations, Graphics, Databases cihte avekin kingah veve hi.

Banghangin hih thu kigen ihhihiam cihleh OpenOffice pen sumpiak kulvetlo in, amawkna ahih manin ihki deihsak mahmah hi. Tulaitak Microsoft Office 2010 bang aleiding hileng amau Package tuamtuamtawh kizui-in, US$150 pan US$500 kikalbang mansak uhhi. Microsoft Office teekteek akisap luatkei nakleh Office dingin tuazahzah sum ihbeisang, adang ihkisapnate ah tua sumteng zekzaw lehang phattuamna tampi omding hi. OpenOffice pen amawkna in hih http://download.openoffice.org tengpan ki Download theiden hi.

Hih OpenOffice.org pen tuma kum 8 laipekpan akizangkhin hi-in, Zomi sungah atheisa leh azangzang khinzong zong tampi ki omkhin hi. Initial Release pen April 30, 2002 in kiciamteh a, anei masa pen StarOffice hi-in tuapan August 1999 kumin Sun Microsystems te'n alei ahihi. Sum tampipi tawh Office azuak ahi Microsoft Office te demnadingin July 2000 kumin a Source Code uh Release khia uhhi. Hih Office Software ong nuntak suaksuak nadingin Oracle Corporation in atungpekpan Sponsor napia a, tuabanah Novell, Red Hat, IBM, Google leh adang kipawlna tuamtuam te'nzong panpih ngenngai uhhi. (Microsoft tebel nuam hetkenteh!)

Amin zongpen OpenOffice cihtawh akitheihzawk hangin hih OpenOffice cih minpen Netherlands gam leh UK gam aom Company te'n na Register khin ahih manin OpenOffice cihpen kizangthei nawnlo suak hi. Tuatangin Legal takin OpenOffice.org cihmin apua hihtuak zaw hi. Gennoppibel ahihleh sumbei liangin Microsoft Office leidingmaw, tua ahih keileh amawkna in OpenOffice zangzaw ding? Microsoft Office vs OpenOffice.org koizaw ateldiam sanggam.

LibreOffice

       LibreOffice acihpen amawkna in akingah Free Software Office Suite khat ahihi. Hih LibreOffice Suite pen "The Document Foundation" te'n ongbawlkhiat hi a, January 25, 2011 panin Initial Release kibawl panhi. LibreOffice aminpen Hybrid Word hi a, "Libre" pen Spanish leh French pau in suaktakna ahihi. "Office" pen Manglai Office mah hipah a, "FreeOffice" cihtawh akibang ahihi.

Hih LibreOffice ongki patkhiat asawtnailoh hangin hih Software pen OpenOffice.org sangin adeihzaw tammahmah a, aki Release zawh 1.3 Million veibang ki download khinhi. Tuabanah nungin ihgenngei Linux Distributor khat ahi Ubuntu te'nzong mailamah ong Release ding Version te ah LibreOffice pen Default Office Suite in zangtading hi. OpenOffice.org sangin akum atawmzawk hang, asem abawltengpen OpenOffice.org pan vive ahih manin, LibreOffice pen zat huaizaw thamhi. OpenOffice.org panin LibreOffice ongki khenkhapna bulpipen atomin hihbang ahihi.

OpenOffice.org pen Oracle Corporation te'n onglei ahih manin, OpenOffice.org pan Developers honkhatin lunghimawh mahmah uhhi. Banghanghiam cihleh nidanginzong Oracle Corporation te'n OpenSolaris onglei uh a, amawkin akingah Open Source panin zuaksum Commercial dingin Closed Source tawh onglaih uhhi. Tuamah bangin OpenOffice.org zong zuaksum Commercial tawh onglaihding alung himawh OpenOffice.org pan Developers honkhatin "The Document Foundation" cihmintawh September 28, 2010 kumin ongki pankhia uhhi. Hihpen OpenOffice.org pan LibreOffice ah amin akikhelkhia cihtheihzong ahihi. Tua ahih manin mailam hunsaupi ah amawkin ihzaktheihding Office Suite ih teldingleh OpenOffice.org sangin LibreOffice zat huaizaw cihding ahihi. Hih The Document Foundation tepen Google, Novell, Red Hat, Canonical leh adang Open Source avei kipawlna tampi-inzong panpih mahmah uhhi. November 01, 2010 ni-in OpenOffice.org ah Developers mi 33 in kasem nawnkeiding uhhi ci'n Resignation Letter pia uhhi.

LibreOffice nadeihleh hih http://www.libreoffice.org panin ki download theihi. Open Office ihzat veve dingleh Long-term ah OpenOffice.org sangin LibreOffice zat huaizaw cih ihgennoppi pen ahihi. Nungdeuh in Microsoft Office sangin OpenOffice.org zat huaizaw cih ihgen ngei a, tu in OpenOffice.og sangin ahoihzaw, amuanhuaizaw LibreOffice ong omthei ahih manin, ih Zomi pihte adingin ihki hilhsawn leuleu hi. Kumpihnop aomleh anuai ah Comment Box ah nong kuppih nadingun kongzawn uhhi.